किं च॒न हि॒नस्ति॒ सो॑ऽबिभेत् प्रतिगृ॒ह्णन्तं॑ मा हिꣳसिष्य॒तीति॑ दे॒वस्य॑ त्वा सवि॒तुः प्र॑स॒वे᳚ऽश्विनो᳚ र्बा॒हुभ्यां᳚ पू॒ष्णो हस्ता᳚भ्यां॒ प्रति॑ गृह्णा॒मीत्य॑ब्रवीथ् सवि॒तृप्र॑सूत ए॒वैन॒द्ब्रह्म॑णा दे॒वता॑भिः॒ प्रत्य॑गृह्णा॒थ् सो॑ऽबिभेत् प्रा॒श्नन्तं॑ मा हिꣳसिष्य॒तीत्य॒ग्नेस्त्वा॒ ऽऽस्ये॑न॒ प्राश्ना॒मीत्य॑ब्रवी॒न्न ह्य॑ग्नेरा॒स्यं॑ किञ्च॒न हि॒नस्ति॒ सो॑ऽबिभे॒त् - [ ]
पदपाठः (Word-by-word)
किम् । च॒न । हि॒नस्ति॑ । सः । अ॒बि॒भे॒त् । प्र॒ति॒गृ॒ह्णन्त॒मिति॑ प्रति - गृ॒ह्णन्त᳚म् । मा॒ । हिꣳ॒॒सि॒ष्य॒ति॒ । इति॑ । दे॒वस्य॑ । त्वा॒ । स॒वि॒तुः । प्र॒स॒व इति॑ प्र - स॒वे । अ॒श्विनोः᳚ । बा॒हुभ्या॒मिति॑ बा॒हु - भ्या॒म् । पू॒ष्णः । हस्ता᳚भ्याम् । प्रतीति॑ । गृ॒ह्णा॒मि॒ । इति॑ । अ॒ब्र॒वी॒त् । स॒वि॒तृप्र॑सूत॒ इति॑ सवि॒तृ - प्र॒सू॒तः॒ । ए॒व । ए॒न॒त् । ब्रह्म॑णा । दे॒वता॑भिः । प्रतीति॑ । अ॒गृ॒ह्णा॒त् । सः । अ॒बि॒भे॒त् । प्रा॒श्नन्त॒मिति॑ प्र - अ॒श्नन्त᳚म् । मा॒ । हिꣳ॒॒सि॒ष्य॒ति॒ । इति॑ । अ॒ग्नेः । त्वा॒ । आ॒स्ये॑न । प्रेति॑ । अ॒श्ना॒मि॒ । इति॑ । अ॒ब्र॒वी॒त् । न । हि । अ॒ग्नेः । आ॒स्य᳚म् । किम् । च॒न । हि॒नस्ति॑ । सः । अ॒बि॒भे॒त् ।