अ॒यं पु॒रो भुव॒स्तस्य॑ प्रा॒णो भौ॑वाय॒नो व॑स॒न्तः प्रा॑णाय॒नो गा॑य॒त्री वा॑स॒न्ती गा॑यत्रि॒यै गा॑य॒त्रं गा॑य॒त्रादु॑पाꣳ॒॒ शुरु॑पाꣳ॒॒ शोस्त्रि॒वृत् त्रि॒वृतो॑ रथन्त॒रꣳ र॑थन्त॒राद्-वसि॑ष्ठ॒ ऋषिः॑ प्र॒जाप॑ति गृहीतया॒ त्वया᳚ प्रा॒णं गृ॑ह्णामि प्र॒जाभ्यो॒ऽयं द॑क्षि॒णा वि॒श्वक॑र्मा॒ तस्य॒ मनो॑ वैश्वकर्म॒णं ग्री॒ष्मो मा॑न॒सस्त्रि॒ष्टुग्ग्रै॒ष्मी त्रि॒ष्टुभ॑ ऐ॒डमै॒डा-द॑न्तर्या॒मो᳚ ऽन्तर्या॒मात् प॑ञ्चद॒शः प॑ञ्चद॒शाद्-बृ॒हद्-बृ॑ह॒तो भ॒रद्वा॑ज॒ ऋषिः॑ प्र॒जाप॑ति गृहीतया॒ त्वया॒ मनो॑ - [ ]
पदपाठः (Word-by-word)
अ॒यम् । पु॒रः । भुवः॑ । तस्य॑ । प्रा॒ण इति॑ प्र - अ॒नः । भौ॒वा॒य॒नः । व॒स॒न्तः । प्रा॒णा॒य॒नः । गा॒य॒त्री । वा॒स॒न्ती । गा॒य॒त्रि॒यै । गा॒य॒त्रम् । गा॒य॒त्रात् । उ॒पाꣳ॒॒शुरित्यु॑प - अꣳ॒॒शुः । उ॒पाꣳ॒॒शोरित्यु॑प-अꣳ॒॒शोः । त्रि॒वृदिति॑ त्रि - वृत् । त्रि॒वृत॒ इति॑ त्रि - वृतः॑ । र॒थ॒न्त॒रमिति॑ रथं - त॒रम् । र॒थ॒न्त॒रादिति॑ रथं - त॒रात् । वसि॑ष्ठः । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ । त्वया᳚ । प्रा॒णमिति॑ प्र - अ॒नम् । गृ॒ह्णा॒मि॒ । प्र॒जाभ्य॒ इति॑ प्र - जाभ्यः॑ । अ॒यम् । द॒क्षि॒णा । वि॒श्वक॒र्मेति॑ वि॒श्व - क॒र्मा॒ । तस्य॑ । मनः॑ । वै॒श्व॒क॒र्म॒णमिति॑ वैश्व - क॒र्म॒णम् । ग्री॒ष्मः । मा॒न॒सः । त्रि॒ष्टुक् । ग्रै॒ष्मी । त्रि॒ष्टुभः॑ । ऐ॒डम् । ऐ॒डात् । अ॒न्त॒र्या॒म इत्य॑न्तः - या॒मः । अ॒न्त॒र्या॒मादित्य॑न्तः - या॒मात् । प॒ञ्च॒द॒श इति॑ पञ्च - द॒शः । प॒ञ्च॒द॒शादिति॑ पञ्च-द॒शात् । बृ॒हत् । बृ॒ह॒तः । भ॒रद्वा॑जः । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ । त्वया᳚ । मनः॑ ।
सायणभाष्यम् — not in the source edition available to this site for this anuvāka.
भट्टभास्करभाष्यम् — not in the source edition available to this site for this anuvāka.