कृ॒ष्णाय॒ स्वाहा᳚ श्वे॒ताय॒ स्वाहा॑ पि॒शङ्गा॑य॒ स्वाहा॑ सा॒रङ्गा॑य॒ स्वाहा॑ ऽरु॒णाय॒ स्वाहा॑ गौ॒राय॒ स्वाहा॑ ब॒भ्रवे॒ स्वाहा॑ नकु॒लाय॒ स्वाहा॒ रोहि॑ताय॒ स्वाहा॒ शोणा॑य॒ स्वाहा᳚ श्या॒वाय॒ स्वाहा᳚ श्या॒माय॒ स्वाहा॑ पाक॒लाय॒ स्वाहा॑ सुरू॒पाय॒ स्वाहा ऽनु॑रूपाय॒ स्वाहा॒ विरू॑पाय॒ स्वाहा॒ सरू॑पाय॒ स्वाहा॒ प्रति॑रूपाय॒ स्वाहा॑ श॒बला॑य॒ स्वाहा॑ कम॒लाय॒ स्वाहा॒ पृश्न॑ये॒ स्वाहा॑ पृश्निस॒क्थाय॒ स्वाहा॒ सर्व॑स्मै॒ स्वाहा᳚ ॥
पदपाठः (Word-by-word)
कृ॒ष्णाय॑ । स्वाहा᳚ । श्वे॒ताय॑ । स्वाहा᳚ । पि॒शङ्गा॑य । स्वाहा᳚ । सा॒रङ्गा॑य । स्वाहा᳚ । अ॒रु॒णाय॑ । स्वाहा᳚ । गौ॒राय॑ । स्वाहा᳚ । ब॒भ्रवे᳚ । स्वाहा᳚ । न॒कु॒लाय॑ । स्वाहा᳚ । रोहि॑ताय । स्वाहा᳚ । शोणा॑य । स्वाहा᳚ । श्या॒वाय॑ । स्वाहा᳚ । श्या॒माय॑ । स्वाहा᳚ । पा॒क॒लाय॑ । स्वाहा᳚ । सु॒रू॒पायेति॑ सु - रू॒पाय॑ । स्वाहा᳚ । अनु॑रूपा॒येत्यनु॑ - रू॒पा॒य॒ । स्वाहा᳚ । विरू॑पा॒येति॒ वि-रू॒पा॒य॒ । स्वाहा᳚ । सरू॑पा॒येति॒ स-रू॒पा॒य॒ । स्वाहा᳚ । प्रति॑रूपा॒येति॒ प्रति॑ - रू॒पा॒य॒ । स्वाहा᳚ । श॒बला॑य । स्वाहा᳚ । क॒म॒लाय॑ । स्वाहा᳚ । पृश्न॑ये । स्वाहा᳚ । पृ॒श्नि॒स॒क्थायेति॑ पृश्नि - स॒क्थाय॑ । स्वाहा᳚ । सर्व॑स्मै । स्वाहा᳚ ॥
सायणभाष्यम् — not in the source edition available to this site for this anuvāka.
भट्टभास्करभाष्यम् (Bhatta Bhaskara Commentary)
1 पुनरप्यश्वरूपाणि जुहोति - कृष्णायेति ॥ अवयवरूपाणि प्रायशः पूर्वत्र, इह तु अवयविरूपाणीति पृथगारम्भः । कृष्णादयः प्रसिद्धाः । पिशङ्गाय गोरोचनवर्णाय । सारङ्गाय चातकवार्णाय । अरुणाय अरुणवर्णय । गौराय शुक्लाय । बभ्रवे कपिलपाण्डराय । नकुलाय नकुलवर्णाय । रोहिताय लोहितवर्णाय । अतिरक्ताय । शोणाय पीतलोहिताय । श्यावाय पीतकृष्णाय । श्यामाय नीलाय । पाकलाय अव्यक्तकृष्णाय, पाकजकृष्णसवर्णायेति केचित् । सुरूपाय शोभनरूपाय । शबलाय व्यामिश्ररूपाय । कमलाय कमलवर्णाय । पृश्नये चित्रवर्णाय । पृश्निसक्थाय, उक्तौ स्वरसमासान्तौ । सर्वस्मै अनुक्तायापि रूपाय ॥
इति सप्तमे तृतीये अष्टादशोनुवाकः ॥