-मे॒तानि॑ दि॒वि रो॑च॒नान्य॒ग्निश्च॑ सोम॒ सक्र॑तू अधत्तं ॥ यु॒वꣳ सिन्धूꣳ॑ र॒भिश॑स्तेरव॒द्या-दग्नी॑षोमा॒-वमु॑ञ्चतं गृभी॒तान् ॥ अग्नी॑षोमावि॒मꣳ सु मे॑ शृणु॒तं ॅवृ॑षणा॒ हवं᳚ । प्रति॑ सू॒क्तानि॑ हर्यतं॒ भव॑तं दा॒शुषे॒ मयः॑ ॥ आऽन्यं दि॒वो मा॑त॒रिश्वा॑ जभा॒राऽम॑थ्नाद॒न्यं परि॑ श्ये॒नो अद्रेः᳚ । अग्नी॑षोमा॒ ब्रह्म॑णा वावृधा॒नोरुं ॅय॒ज्ञाय॑ चक्रथुरु लो॒कं ॥अग्नी॑षोमा ह॒विषः॒ प्रस्थि॑तस्य वी॒तꣳ - [ ]
पदपाठः (Word-by-word)
ए॒तानि॑ । दि॒वि । रो॒च॒नानि॑ । अ॒ग्निः । च॒ । सो॒म॒ । सक्र॑तू॒ इति॒ स - क्र॒तू॒ । अ॒ध॒त्त॒म् ॥ यु॒वम् । सिन्धून्॑ । अ॒भिश॑स्ते॒रित्य॒भि - श॒स्तेः॒ । अ॒व॒द्यात् । अग्नी॑षोमा॒वित्यग्नी᳚ - सो॒मौ॒ । अमु॑ञ्चतम् । गृ॒भी॒तान् ॥ अग्नी॑षोमा॒वित्यग्नी᳚ - सो॒मौ॒ । इ॒मम् । स्विति॑ । मे॒ । शृ॒णु॒तम् । वृ॒ष॒णा॒ । हव᳚म् । प्रतीति॑ ॥ सू॒क्ता॒नीति॑ सु - उ॒क्तानि॑ । ह॒र्य॒त॒म् । भव॑तम् । दा॒शुषे᳚ । मयः॑ ॥ एति॑ । अ॒न्यम् । दि॒वः । मा॒त॒रिश्वा᳚ । ज॒भा॒र॒ । अम॑थ्नात् । अ॒न्यम् । परीति॑ । श्ये॒नः । अद्रेः᳚ ॥ अग्नी॑षो॒मेत्यग्नी᳚ - सो॒मा॒ । ब्रह्म॑णा । वा॒वृ॒धा॒ना । उ॒रुम् । य॒ज्ञाय॑ । च॒क्र॒थुः॒ । उ॒ । लो॒कम् ॥ अग्नी॑षो॒मेत्यग्नी᳚ - सो॒मा॒ । ह॒विषः॑ । प्रस्थि॑त॒स्येति॒ प्र - स्थि॒त॒स्य॒ । वी॒तम् ।