(ச.பா) இந்த சம்வத்சர ஆத்மாவான ஆதித்யனுக்கு ஐந்து ருதுக்கள் பாதங்களாக உள்ளன. அந்த இந்த ஐந்து பாதங்களால் இவன் சுழன்று கொண்டு இருக்கின்றான். ஹேமந்தம், சிசிரம், என்ற ருதுக்களை ஒன்றாகச் செய்து ஐந்து என்று கல்பனை செய்யப்பட்டுள்ளது. எல்லாவற்றையும் உண்டுபண்ணுவதால் அவனுக்கு தந்தையின் தன்மை, அவன் பன்னிரெண்டு மாதங்களையும் தன்னுடைய ஆகாரமாய் (உருவமாய்) கொண்டுள்ளான். அல்லது பன்னிரெண்டு மாதங்களையும் தனக்கு அவயவங்களாகக் கொண்டுள்ளான் என்றும் பொருள் கொள்ளலாம். தேவலோகத்தைக் காட்டிலும் மேலே உள்ள மூன்றாவது லோகத்தின் நடுப்பகுதியில் தண்ணீர் மயமாக இவன் இருக்கிறான் என்று காலத்தை அறிந்தோர் கூறுவர்.