(ச.பா) பிருதிவீ என்ற ஸ்தூல பஞ்ச குணமான பிருதிவியும், அதற்குக் காரணமான கந்ததன் மாத்திரையோடு கூடிய பிருதிவி மாத்திரையும் ஆகும். அவ்வாறே தண்ணீரும் அதன் மாத்திரையும், தேஜஸ்ஸும் அதன் மாத்திரையும், வாயுவும் அதன் மாத்திரையும், ஆகாசமும் அதன் மாத்திரையும் ஆகும். ஸ்தூலமாயும் சூக்ஷ்மமாயும் உள்ள பூதங்கள் என்பது பொருள். அவ்வாறே சக்ஷுஸ் இந்திரியமும், அதனால் பார்க்கத்தக்க ரூபமும் ஆகும். அவ்வாறே சிரவணேந்திரியமும் அதனால் கேட்கத்தக்கதும், கிராணேந்திரியமும் அதனால் முகரத்தக்கதும், ரசனேந்திரியமும் அதனால் சுவைக்கத்தக்கதும், துவக் இந்திரியமும், அதனால் தொடத்தக்கதும், வாக் இந்திரியமும் அதனால் சொல்லத்தக்கதும், ஹஸ்தங்களும் அதனால் எடுக்கத்தக்கவையும், ஜனனேந்திரியமும் அதனால் மகிழத்தக்கதும், பாயு இந்திரியமும், அதனால் வெளியேற்றத்தக்கவைகளும், கால்களும் அதனால் அடையத்தக்கதும் ஆகும். இவ்வாறு புத்தி இந்திரியங்களும், கர்மேந்திரியங்களும் கூறப்பட்டன. மனதை முன்பே கூறிவிட்டோம். நினைக்கத்தக்கது அதன் விஷயமாகும். மனது நினைத்ததை நிச்சயிப்பது புத்தி, அறியத்தக்கது அதன் விஷயம். அஹங்காரம் என்பது அகங்கார லக்ஷணமான அந்தக்கரணம். அஹம் என்ற பாவனை அதன் விஷயம். சித்தம் என்பது சேதனத்தோடு கூடிய அந்தக்கரணம். சேதனாவத்தாய் இருப்பது அதன் விஷயம். தேஜஸ் என்பது துவக் இந்திரியத்தைக் காட்டிலும் வேறுபட்டு பிரகாசத்துடன் கூடியிருக்கும் துவக் விஷயமாகும். அதனால் பிரகாசிக்கும் விஷயம் அறியத்தக்கது. பிராணன் என்று எதை சூத்திரமாக கூறுகிறோமோ அதனால் இணைக்கப்பட்ட யாவும் தரிக்கத்தக்கதும், பிளக்கத்தக்கதும் ஆகும். இவ்வாறு சமஸ்த காரிய சொரூபத்துடன் ஒன்றினயவையாய் ஆகின்றன.