उत्त॑रे॒ष्वहः॑ स्व॒मुतो॒ऽर्वाञ्चो॑ गृह्यन्ते ऽभि॒जित्यै॒वेमां ॅलो॒कान् पुन॑रि॒मं ॅलो॒कं प्र॒त्यव॑रोहन्ति॒ यत् पूर्वे॒ष्वहः॑ स्वि॒तः परा᳚ञ्चो गृ॒ह्यन्ते॒ तस्मा॑दि॒तः परा᳚ञ्च इ॒मे लो॒का यदुत्त॑रे॒ष्वहः॑ स्व॒मुतो॒ऽर्वाञ्चो॑ गृ॒ह्यन्ते॒ तस्मा॑द॒मुतो॒ ऽर्वाञ्च॑ इ॒मे लो॒कास्तस्मा॒दया॑तयाम्नो लो॒कान् म॑नु॒ष्या॑ उप॑ जीवन्ति ब्रह्मवा॒दिनो॑ वदन्ति॒ कस्मा᳚थ् स॒त्याद॒द्भ्य ओष॑धयः॒ सं भ॑व॒न्त्योष॑धयो - [ ]
पदपाठः (Word-by-word)
उत्त॑रे॒ष्वित्युत् - त॒रे॒षु॒ । अहः॒ स्वित्यहः॑-सु॒ । अ॒मुतः॑ । अ॒र्वाञ्चः॑ । गृ॒ह्य॒न्ते॒ । अ॒भि॒जित्येत्य॑भि-जित्य॑ । ए॒व । इ॒मान् । लो॒कान् । पुनः॑ । इ॒मम् । लो॒कम् । प्र॒त्यव॑रोह॒न्तीति॑ प्रति - अव॑रोहन्ति । यत् । पूर्वे॑षु । अहः॒ स्वित्यहः॑ - सु॒ । इ॒तः । परा᳚ञ्चः । गृ॒ह्यन्ते᳚ । तस्मा᳚त् । इ॒तः । परा᳚ञ्चः । इ॒मे । लो॒काः । यत् । उत्त॑रे॒ष्वित्युत् - त॒रे॒षु॒ । अहः॒ स्वित्यहः॑ - सु॒ । अ॒मुतः॑ । अ॒र्वाञ्चः॑ । गृ॒ह्यन्ते᳚ । तस्मा᳚त् । अ॒मुतः॑ । अ॒र्वाञ्चः॑ । इ॒मे । लो॒काः । तस्मा᳚त् । अया॑तयाम्न॒ इत्यया॑त-या॒म्नः॒ । लो॒कान् । म॒नु॒ष्याः᳚ । उपेति॑ । जी॒व॒न्ति॒ । ब्र॒ह्म॒वा॒दिन॒ इति॑ ब्रह्म - वा॒दिनः॑ । व॒द॒न्ति॒ । कस्मा᳚त् । स॒त्यात् । अ॒द्भ्य इत्य॑त् - भ्यः । ओष॑धयः । समिति॑ । भ॒व॒न्ति॒ । ओष॑धयः ।