पुरुस्पृह ऋत्विगादिभिरभिलष्यमाणा रायः पश्वादिधनान्यस्मे अस्मासु यजमानेषु दिवे दिवे प्रतिदिनं सं चरन्तु । प्रचरन्त्यो भवन्तु । दिव्यब्दादुत्तरस्याः सप्तम्याः सुपां सुलुगित्यादिना शे आदेश ऊडिदमित्यादिना च तस्योदात्तत्वम् । नित्यवीप्सयोरिति द्विर्भावे सत्युत्तरभागस्यानुदात्तं चेत्यनुदात्तत्वम् । वाजासोऽन्नानिचास्मे अस्मानीरताम् । यज्ञार्थं प्रेरयन्तु ॥ ७ ॥