वृषा कामानां वर्षको हरितो हरिद्वर्णोपेतो जज्ञानो जात इन्द्रो विश्वं सर्वं रोचनं दीप्यमानं लोकमा भाति । सर्वतः प्रकाशयति । तत्या हर्यश्व इन्द्रो हरितं हरिद्वर्णोपेतमायुधं धत्ते । बाह्वोर्धत्ते । तथा हरिं शत्रूणां प्रणहारकं वज्रं बाह्वोराधत्ते ॥ जज्ञानः । जनी प्रादुर्भाव इत्यस्य लिटः कानच् । गमहनेत्यादिनोपधालोपः । चित्त्वादन्तोदात्तः । भाति । भा दीप्तावित्यस्यान्तर्भावितण्यर्थस्य लटि रूपम् । रोचनम् । रुच दीप्तावित्यस्मादनुदात्तेतश्च हलादेरिति युच् । चित्त्वादन्तोदात्तः । बाह्वोः । उदात्तयणोहल्पूर्वादिति विभक्तेरुदात्तत्वं ॥ ४ ॥