आ या॒त्विन्द्रो᳚ दि॒व आ पृ᳚थि॒व्या म॒क्षू स᳚मु॒द्रादु॒त वा॒ पुरी᳚षात् ।
स्व᳚र्णरा॒दव᳚से नो म॒रुत्वा᳚न्परा॒वतो᳚ वा॒ सद᳚नादृ॒तस्य᳚ ॥
स्व᳚र्णरा॒दव᳚से नो म॒रुत्वा᳚न्परा॒वतो᳚ वा॒ सद᳚नादृ॒तस्य᳚ ॥
पदपाठः (Word-by-word)
आ । या॒तु॒ । इन्द्रः᳚ । दि॒वः । आ । पृ॒थि॒व्याः । म॒क्षु । स॒मु॒द्रात् । उ॒त । वा॒ । पुरी᳚षात् ।
स्वः᳚॑नरात् । अव᳚से । नः॒ । म॒रुत्वा᳚न् । प॒रा॒॑वतः᳚ । वा॒ । सद᳚नात् । ऋ॒तस्य᳚ ॥
स्वः᳚॑नरात् । अव᳚से । नः॒ । म॒रुत्वा᳚न् । प॒रा॒॑वतः᳚ । वा॒ । सद᳚नात् । ऋ॒तस्य᳚ ॥
सायणभाष्यम् (Sayana Commentary)
मरुत्वान्मरुद्भिः सहित इन्द्रो नोऽस्माकमवसे रक्षणाय दिवः स्वर्गलोकादायातु । आगच्छतु । पृथिव्या भूलोकाच्च मक्षु शीघ्रमा यातु । उत वा अथवा समुद्रादन्तरिक्षलोकाच्चायातु । समुद्र इत्यन्तरिक्षनाम सगरः समुद्रोऽध्वरमिति तन्नामसु पाठात् । अथवा पुरीशादुदकादायातु । पुरीषमित्युदकनाम मधु पुरीषं पिप्पलमिति तन्नामसु पाठात् । स्वर्णरात् स्वरादित्यो नरो नेता यस्य तस्माल्लोकाद्वायातु । परावतो वा दूराद्वायातु । ऋतस्योदकस्य सदनात्स्थानान्मेघलोकाद्वायातु ॥ ३ ॥