हे मदीया ऋत्विजो गव्यं गोसमूहरूपं गोसम्बन्धिनं वाजिं सङ्घातमभ्यर्शत । अभिगच्छत । अभिगमयत वा सुष्टुतिं शोभनां स्तुतिम् । अत्र गोशब्देनोदकानि गावो वोच्यन्ते । तत्सङ्घातोऽभिप्रेतः । अस्मासु यजमानेषु भद्रा स्तुत्यानि द्रविणानि धत्त । धारयत । स्तुत्या खलु फलम् लप्स्यते । किञ्च नोऽस्मदीयमिमं यज्ञं देवता अत्र यष्टव्यान्देवान्नयत । प्रापयत । घृतस्य धारामधुमद्यथा तथा पवन्ते । गच्छन्ति ॥ १० ॥