अनिरेण । इरान्नम् । तद्रहितेन फल्ग्वेनोक्थेन प्रतीत्येन प्रतिगन्तव्येन । आरोह्येणेत्यर्थः । कृधुना ह्रस्वेन । कृध्विति ह्रस्वनाम कृधोको वम्रक इति तन्नामसूक्तत्वात् । एवं विधेन वचसातृपासोऽतृप्ता जनाः । अध अधुनेहास्मिन् लोके हे अग्ने ते त्वां किं वदन्ति । निर्हविष्केण वचसा न किञ्चिल्लभ्यत इत्यर्थः । किन्त्वनायुधासः । आयुधशब्दः साधनं लक्षयति । हविरादिसाधनरहितास्तेऽसता जुःखेन सचन्ताम् । सङ्गच्छन्तां ॥ १४ ॥