आ न इन्द्र इत्येकादशर्चं दशमं सूक्तं वामदेवस्यार्षं त्रैष्टुभमैन्द्रम् । आ न इत्यनुक्रमणिका । पृष्थ्याभिप्लवषडहयोः प्रथमेऽहनि निश्केवल्य एतन्निविद्धानीयम् । सूत्रितं च । आ न इन्द्र इति निष्केवल्यम् । आ. ७-५ । इति । महाव्रतेऽप्येतत्संपातसूक्तम् । तथैव पञ्चमारण्यके सूत्रितं च । आ न इन्द्रो दूरादा न आसादिति सम्पातः ॥ ऐ. आ. ५-२-२- । इति ॥

अभिष्टिकृद्यजमानसंबन्धिनामभीष्टानाम् कर्तोग्रस्तेजस्वीन्द्रो नोऽस्माकमवसे रक्शणाय दूरादा यासत् । आयातु । आगच्छतु । अपि च आसादासन्नादन्तिकाच्चनोऽस्माकमवसे रक्शणाया यासत् । आयातु । कीदृशः । समत्सु सङ्ग्रामेशु सङ्गे शत्रुभिः संयोगे सति पृतन्यून् शत्रून् तुर्वणिर्हिंसन् वज्रबाहुर्वज्रहस्तो नृपतिर्वृष्तिद्वारा नृणां मनुष्याणां पालक ओजिश्थेभिरतिशयेन तेजस्विभिर्मरुद्भिर्युक्त इति शेशः ॥ १ ॥