एषामृभूणामपोऽश्वरथनिर्माणादिरूपं कर्म देवा इन्द्रादयोऽजुषन्त । आसेवन्त । इन्द्रो हरी युयुजे अश्विना रथमित्यादिमन्त्रोक्तप्रकारेण स्वीकृतवन्त इत्यर्थः । कीदृशास्ते । क्रत्वा वरप्रदानरूपेण कर्मणा मनसा शोभनेन चित्तेनानुग्रहयुक्तेनाभि दीध्याना दीप्यमानाः । देवानामनुग्रहेण किं लब्धमित्याह । सुकर्माशोभनव्यापारो वाजः कनीयान्देवानां सर्वेषां सम्बन्ध्यभवत् । तथेन्द्रस्य संबन्ध्यृभुक्षा ऋभुज्येष्ठः । व्भ्वा मध्यमो वरुणस्य सम्बन्ध्यभवत् ॥ ९ ॥