इदमाद्यृक्त्रयं पुरोहितप्रशम्सेति ब्राह्मणम् । ऐ. ब्रा. ८-२६ । अथवा सूक्तस्य ऋग्द्वयवर्जितस्य बार्हस्पत्यत्वाद्वृहस्पतेरेव स्तुतिः । स इत्स एव राजा मूर्धाभिषिक्तोऽन्यो वा राजमानः प्रतिजन्यानि । जन्यं युद्धं प्रति बालानीत्यर्थः । प्रत्यर्थिजनपदानि वा तानि विश्वा सर्वाणि शुष्मेण बलेन वीर्येण शरीरसामर्थ्येन वाभि अभिगम्याक्रम्य तस्थौ । तिष्ठति । स इत्युक्तं क इत्याह । यो बृहस्पतिं बृहतां महतां पालयितारम् देवमुक्त लक्षणं पुरोहितं वा सुभृतं सुष्ठु हविः स्तोत्रादिनान्नाच्छादनादिना वा बिभर्ति भरति । वल्गूयति स्तौति । वन्दते नमस्करोति च पूर्वभाजमितरेभ्यः प्रथमसम्भक्तारं कृत्वा । एवं यः करोति स एव तस्थाविति ॥ ७ ॥