अग्नीषोमप्रनयने सोमो जिगातीत्याद्यास्तिस्र ऋचः । सूत्रितं च । सोमो जिगाति गातुविद्देवानां तमस्य राजा वरुणस्तमश्विनेत्यर्धर्च अरमेत् । आ. ४-१० । इति ।

गातुवित् गातुर्वेदिमार्गः तं जानानः सोमो जिगाति । गच्छति । गन्तव्यं स्थानं दर्शयति । देवानां सम्बन्धि निष्कृतं संस्कृतमासदं सर्वैरासदनीयमृतस्य यज्ञस्य योनिं स्थानं हविर्धानाख्यमेति । प्राप्नोति । जिताति । गा स्तुतौ । जुहोत्यादिः ॥ १३ ॥