सोमः स्तोतृभ्योऽस्मभ्यं तथा द्विपदेऽस्मदीयाभ्यो द्विपाद्भ्यः प्रजाभ्यश्चतुष्पदे पशवे चतुष्पाद्भ्यो गवादिपशुभ्यश्चानमीवा रोगवर्जितानीषोऽन्नानिकरत् । करोतु । चतुष्पदे । भ संज्ञायां पादस्य पद्भावः । इसुसोः सामर्थ्य इति सम्हितायां सत्वम् । आदेशप्रत्यययोरिति षत्वम् । बहुव्रिहौ पूर्वपदस्वरः । करत् । करोतेर्लेट्यडागमः । इषस्करदित्यत्र सम्हितायां कः करत्करतीत्यादिना सत्वं ॥ १४ ॥