हे अग्ने आयोर्मनुष्यस्य दुर्यासु गृहेष्वदब्धाः केनाप्यरितस्कृता निधारयन्तो निवसन्तः कवयह् क्रान्तदृशो देवाः कविं मेधाविनं त्वां शशासुः; होता भवेति शशंसुः । अतः कारणादर्यो यज्ञस्य स्वामी त्वं दृश्यान्दर्शनीयानद्भुतानाश्चर्यरूपोपेतानिन्द्रादीनेतान्देवानेवैर्गमनशीलैः षड्भिः पादैः स्वतेजोभिः पश्येः । जानीयाः । दृश्यान् । दृशिर् प्रेक्षणे । ऋदुपधाच्चाक्लृपिचृतेः । पा. ३-१-११० । इति कर्मणि क्यप् । कित्त्वादगुणः । पित्त्वादनुदात्तत्वे धातुस्वरः ॥ १२ ॥