वेधो विधातर्हे अग्ने कवये मेधाविने ते तुभ्यमेतैतान्युचथान्युक्थानि शस्त्राण्यवोचाम । त्वं ता तानि जुषस्व । सेवस्व । किञ्च त्वमुच्छोचस्व । उद्दीप्यस्व । नोऽस्मान्वस्यसोऽतिशयेन धनयुक्तान् कृणुहि । कुरु । तदेवोच्यते । पुरुवारपुरुभिर्बहुभिर्वरणिय महो रायो महद्धनं प्र यन्धि । अस्मभ्यं प्रयच्छ । अवोचाम । वच परिभाषणे । लुङि च्लेरङादेशः । पादादित्वादनिघातः । कृणुहि । कृवि हिंसाकरणयोरित्यस्य लोटि रूपम् । तिङ उत्तरत्वादनिघातः । वस्यसः । वसुमच्छब्दादीयसुनि विन्मतोर्लुगिति मतुपो लुकि टिलोपे च कृत ईकारलोपश्छान्दसः । यन्धि । यमेर्लोटि बहुलं छन्दसिति विकरनस्य लुक् । वा छन्दसीति हेर्विकल्पेन पित्त्वादङितश्चेति धिरादेशः ॥ २० ॥