यम्या यमरूपे मिथुनभुते अहश्च रात्रिश्चेत्येते नाना नानाविधानि वपूंषि शुक्ल कृष्णादीनि रूपाणि चक्राते । कुरुतः । श्यावी कृष्णवर्णारुषी शुक्लतयारोचमाना यत् ये परस्परं स्वसारौ भवतस्तयोर्मध्येऽन्यदर्जुनमहोरोचते । किरनसंबन्धाद्दीप्यते । अन्यद्रात्रिलक्षणं कृष्णं तमस्संबन्धात् कृष्णवर्णमाभाति । यम्या । सुपो डादेशः । रोचते । एकान्याभ्यां समर्थाभ्यामिति न निघातः ॥ ११ ॥