रायस्कामो धनकामो गोतमो यमग्निं गिरा स्तुत्या दुवस्यति परिचरति तमु तमेव त्वां द्युम्नैर्दोतमानैः स्तोत्रैराभिमुख्येन पुनःपुनः स्तुमः ॥ रायस्कामः । रायो धनानि कामयत इति रायस्कामः । कर्मण्यण् । तत्पुरुषे कृति । बहुलमिति बहुलवचनादलुक् । ऊडिदमित्यादिना पूर्वपदस्य विभक्तेरुदात्तत्वम् । दासीभारादित्वात्पूर्वपदप्रकृतिस्वरत्वम् । अतः कृकमिकंसकुंभेति (पा ८-३-४६) विसर्जनीयस्य सत्वम् । द्युवस्यति । दुवस उपतापे परिचरणे च । कंड्वादिः ॥ २ ॥