हे सवितः ते तव पंथा मार्गाः पूर्व्यासः पूर्वसिद्धा अरेणवो धूलिरहिता अंतरिक्षे सुकृताः सुष्टु संपादिताः । सुगेभिः सुष्टु गंतुं शक्यैस्तेभिः पथिभिस्तैर्मार्गैरागत्याद्यास्मिन्दिने नोऽस्मान्रक्ष च । पालनमपि कुरु । तथा हे देव नोऽस्माननुष्ठातृनधि ब्रूहि च । देवानामग्रेऽधिकत्वेन कथय च ॥ पंथाः । सुपां सुलुगिति जसः सुः । पथिमथोः सर्वनामस्थान इत्याद्युदात्तत्वम् । पूर्व्यासः । पूर्वैः कृताः पूर्व्याः । पूर्वै कृतमिनियौ च (पा ४-४-१३३) इति यः । प्रत्ययस्वरः । असुगागमः । अरेणवः । नञ् सुभ्यामित्युत्तरपदांतोदात्तत्वम् । सुकृताः । कर्मण क्तः । गतिरनंतर इति गतेः प्रकृतिस्वरत्वम् । सुगेभिः । सुष्टु गच्छंत्येष्विति सुगाः । सुदुरोरधिकरणे । पा ३-२-४८-३ । इति गमेर्डप्रत्ययः । कृदुत्तरपदप्रकृतिस्वरत्वम् । रक्ष । द्वचोऽतस्तिङ इति संहितायां दीर्घः ॥ ७ ॥ ११ ॥