हे अश्विना मतीनां स्तुतीनां पाराय गंतवे पारं गंतुं नावा नौरूपेण गमनसाधनेन नोऽस्मान्प्रत्या यातम् । समुद्रमध्यादागच्छतम् । भूमावागंतुं रथं भवदीयं युंजाथाम् । साश्वं कुरुतं ॥ नावा । सावेकाच इति विभक्तेर्मुदात्तत्वम् । गंतवे । तुमर्थे सेसेनिति तवेन्प्रत्ययः । नित्त्वादाद्युदात्तत्वंयुंजाथाम् । युजिर् योगे । लोट्याथामिति रुधादित्वाच्छ्नम् । श्नसोरल्लोपः । प्रत्ययस्वरः ॥ ७ ॥