आ या᳚हि॒ वन᳚सा स॒ह गावः᳚ सचन्त वर्त॒निं यदूध᳚भिः ॥
पदपाठः (Word-by-word)
आ । या॒हि॒ । वन᳚सा । स॒ह । गावः᳚ । स॒च॒न्त॒ । व॒र्त॒निम् । यत् । ऊध᳚॑भिः ॥
सायणभाष्यम् (Sayana Commentary)
आ याहीति चतुरृचमेकविंशं सूक्तमाङ्गिरसस्य संवर्तस्यार्षमुषोदेवताकम्। चतस्रोऽपि विंशतिका द्विपदा विराजः। तथा चानुक्रान्तम्। आ याहि संवर्त उषस्यं द्वैपदमिति। प्रथमे छन्दोमे वैश्वदेवसूक्तात्पूर्वमिदं सूक्तम्। सूत्रितं च। आ याहि वनसेमा नु कं बभ्रुरेक इति द्विपादासूक्तानि। आ. ८-७। इति। महाव्रतेऽपि निष्केवल्य एतत्। तथैव पञ्चमारण्यके सूत्रितम् । ऐ. आ. ५-२-२॥
हे उषः वनसा वननीयेन तेजसा धनेन सार्धमा याहि। आगच्छ। गाव उषसो वाहनभूता वर्तनिं रथं सचन्त। सेवन्ते। अतस्तेन रथेनायाहीत्यर्थः। यद्या गाव ऊधभिरुपलक्शिताः प्रभूताः। पीना इत्यर्थः। ता गाव इति सम्बन्धः॥१॥