नराशंसं नरैः शंसनीयं वाजिनमन्नवंतमग्निं वाजयन् उपवाजयन् प्रज्वलयन्निहास्मिन्काले स्तौमीति शेषः । तथा क्षयद्वीरमतिबलिनम् । यस्मिन्सर्वे वीराः क्षीयंते । एवंरूपं पूषणं पोषकं देवं सुम्नैः सुखकरैः स्तोत्रैर्हेतुभूतैरीमहे । याचामहे । अभीष्टं प्रार्थयामहे ॥ नराशंसम् । उभे वनस्पत्यादिष्टिति युगपदुभयपदप्रकृतिस्वरत्वम् । नरशब्द ॠदोरबित्यबंत आद्युदात्तः । निपातनाद्दीर्घः । शंसशब्दो घञांत आद्युदात्तः । वाजयन् । वज व्रज गतौ । अस्माण्णिच् । क्षयद्वीरम् । क्षि क्षये । लटः शतृ । शपि प्राप्ते व्यत्ययेन शः । तस्य छंदस्युभयथेत्यार्धधातुकत्वेन ङित्त्वाभावाद्गुणायादेशौ । आदुपदेशाल्लसार्वधातुकानुदात्तत्वे । विकरणस्वरः । अतो गुण इति परपूर्वत्व एकादेश उदात्तेनेत्येकादेश उदात्तः । क्षयंतो वीरायस्मिन् । बहुव्रीहौ पूर्वपदप्रकृतिस्वरत्वं ॥ ४ ॥