रायो धनस्य बुध्नो बन्धको मूलभूतो वा। ऊडिदमित्यादिना रैशब्दाद्विभक्तेरुदात्तत्वम्। तथा वसूनां धनानां सङ्गमनः सङ्गमयिता प्रापयिता ईदृशः सविता शचीभिर्दीप्तिभिर्विश्वा रूपा सर्वाणि रूपाणि निरूपणीयानि पदार्थजातान्यभिचष्टे। अभिपश्यति। प्रकाशयति। अपि च देव इवायं सविता सावको देवः सत्यधर्मा सत्यमवितथं धर्म धारणम् धारणहेतुभूतं कर्म वा यस्य तादृशो भवति तथेन्द्रो नेन्द्र इव धनानां समरे सङ्ग्रामे सम्यक्प्रपणे तस्थौ। अयं सवितोद्युक्तः संस्तिष्ठति॥३॥