हे सोम त्वया सहितं गन्धर्वं गीतरूपां गां शब्दं धारयन्तं विश्वावसुमेतत्संज्ञं माम् । उत्तरत्र तच्छब्दश्रुतेर्यच्छब्दाध्याहरः। यदापो वसतीवर्याख्या ददृशुषीर्दृष्टवत्यः। दृशेर्लिटः क्वसुः। उगितश्चेति ङीप्। वसोः सम्प्रसारणमिति सम्प्रसारणम्। जसि वा छन्दसीति पूर्वसवर्णदीर्घः। तत्तदानीमृतेन ररहाणो गमयितेन्द्रोऽन्ववैत्। अस्वबुध्यत। बुद्ध्वा च कुत्र यज्ञः प्रवृत्त इति सूर्यस्य परिधीन्परितो धीयमानान्प्राच्यादिदिग्विभागान्पर्यपश्यत्। परितो दृष्टवान्॥४॥