हे विश्ववार सर्वैर्वरणीय पुरुहूत बहुभिः स्वस्वकर्मण्याहूत सखे सखिवत्प्रिय वसो निवासहेतो इंद्र तं पूर्वोक्तगुणयुक्तं त्वां जरितृभ्यः स्तोतृणामनुग्रहार्थमाशास्महे । प्रार्थयामहे ॥ आ शास्महे । आङः शासु इच्छायाम् । अदिप्रभृतिभ्यः शप इति शपो लुक् । वसो नामंत्रिते समानाधिकरण इति पूर्वस्याविद्यमानवत्वनिषेधात्परांगवद्भावे सति शेषनिघातेन वामंत्रितस्य चेति वा सर्वानुदात्तत्वम् । जरितृभ्यः । जरतिः स्तुतिकर्मा । तृचश्चित्त्वादंतोदात्तत्वं ॥ २९ ॥ १० ॥