कवयो मेधाविन ऋत्विजः सीरा सीराणि कर्षणसाधनानि युञ्जन्ति। योजयन्ति। युगा युगान्यपि पृथक् परस्परं वि तन्वते। भिन्नप्रदेशानि कुर्वन्ति। कीदृशाः कवयः। देवेषु विषये धीरा धीमन्तः। किमर्थं सुम्नया। सुम्नमिति सुखनाम। सुखेच्छया। सुम्नशब्दात्क्यजन्ताद्भावे अ प्रत्ययादित्यकारप्रत्ययः। सुपां सुलुगिति तृतीयाया आकारः। अथवा धीरा धीमन्तो देवेषु सुम्नया सुम्नेन। देवेषु सुखं भूयादिति। सुपां सुलुगिति विभक्तेर्याजादेशः॥४॥