हे इन्द्र भ्राश्यानि प्रकाश्यानि तिग्मानि तीक्ष्णान्यायुधानि नितरां भ्राशयन् प्रकाशयन्। भ्राशृ दीप्तौ। स त्वं यातुजूनाम्। जु इति सौत्रो धातुः। भ्राजभासेत्यत्र जवतेर्दीर्घः। का. ३-२-१७७-१। क्विप्चेति क्विप्। दीर्घस्यामि नुडागमश्छान्दसः। यातुधानानां स्थिरा स्थिराणि दृढान्यपि शरीराण्यव तनुहि। अवस्तात्तनुभूतान्पातय। उग्रायोद्गूर्णबलाय ते तुभ्यं सहः शत्रुसहनसमर्थं बलं बल्हेतुकं हविर्ददामि। अहं प्रयच्छामि। ततो विगदेषु । विविधं गदन्ति शब्दायन्ते। गदेर्घञर्थे कविधानमित्यधिकरने कः। शत्रून्प्रतीत्य प्रतिगम्य प्रतिकूलं गत्वा वृश्च । तांश्छिन्द्धि। ओव्रश्चू छेदने तौदादिकस्य लोट्॥५॥