पुर्वोऽर्धर्चः परोक्षकृतः उत्तरः प्रत्यक्षकृतः। एषामेकस्मिन्कर्मणि सह प्रवृत्तानामृत्विजां स्तोतॄणां वा मन्त्रः स्तुतिः शस्त्राद्यात्मका गुप्तभाषणम् वा समान एकविधोऽस्तु। तथा समितिः प्राप्तिरपि समान्येकरूपास्तु। केवलमामकेत्यादिना समानशब्दाद्ङीप्। उदात्तनिवृत्तिस्वरेण ङीप उदात्तत्वम्। तथा मनो मननसाधनमन्तः करणं चैषां समानमेकविधमप्यस्तु। चित्तं विचारजं ज्ञानं तथा सह सहितं परस्परस्यैकार्थेनैकीभूतमस्तु। अहं च वो युष्माकं समानमेकविधं मन्त्रमभिमन्त्रये। ऐकविध्याय संस्करोमि। तथा वो युश्माकं स्व भूतेन समानेन साधारणेन हविषा चरुपुरोडाशादिनाहं जुहोमि। तृतीया च होश्छन्दसि। पा. २-३-३। इति कर्मणि कारके तृतीया। वषट्कारेण हविः प्रक्षेपयामीत्यर्थः॥३॥