दाशुषे हवींषि दत्तवते मर्त्याय मनुष्याय यजमानाय गोमती र्गोमत्यो बहुभिर्गोभिर्युक्ताः सर्ववीराः सर्वैः सरणसमर्थैवीरैः शूरैर्युक्ता या उषसो व्युच्छंति । तमो वर्जयंति वायोरिव वायुवच्छीघ्रं प्रवर्तमानानां सूनृतानां स्तुतिरूपाणां वाचामुदर्के समाप्तावश्वदा आश्वानां दात्रीस्ता उषसः सोमसुत्वा सोमानामभिषोता यजमानोऽश्नवत् । व्याप्नोतु ॥ दाशुषे । दाशृ दाने । दाश्वान्साह्वानिति क्वसुप्रत्ययांतो निपात्यतो । चतुर्थ्येकवचने वसोः संप्रसारणमिति संप्रसारणम् । शासिवसिघसीनां चेति षत्वम् । अश्नवत् । अशू व्याप्तौ । व्यत्ययेन परस्मैपदम् । लेट्यडागमः । इतश्च लोप इतीकारलोपः । सोमसुत्वा । षुञ् अभिषवे । अन्येभ्योऽपि दृश्यंत इति क्विनप् । ह्रस्वस्य पितीति तुक् ॥ १८ ॥