पक्षिणी पक्षोपेता हेतिर्हननहेतुः कपोतोऽस्मान्न दभाति। न हिनस्तु। आष्ट्र्यां व्याप्तायामरण्यान्यामग्निधाने। अग्निर्निधीयतेऽस्मिन्नित्यग्निसहिते प्रदेशे पदं स्थानं कृणुते। करोति। तत्रैव प्रदेशे निवसत्वित्यर्थः। यद्वा। अश्नंत्यस्मिन्नित्याष्ट्री पचनशाला। तस्याम् । अग्निधाने यत्र पचनाग्निर्निधीयते तस्मिन्प्रदेशे पदं पादनिधानम् कृणुते। करोति। तद्धेतुको बाधो नोऽस्माकं न भवत्वित्यर्थः। अपि च नोऽस्माकं गोभ्यश्च पुरुषेभ्यश्च शं सुखं शंसनीयानां दोषाणां शान्तिर्वास्तु। भवतु। हे देवाः इहास्मिन्गृहे कपोतो नोऽस्मान्मा हिंसीत्। युद्मदनुग्रहान्मा बाधाताम्॥३॥