हे इन्द्र ते तव महिमनो महिम्नः समस्य सर्वस्याप्यन्तं पारमस्मदस्मत्तः पूर्व ऋषयः क आपुः। प्राप्नुवन्। न कोऽपीत्यर्थः। यद्यपि महत्त्वं प्रख्यापयन्ति तथापि न कात्स्न्येनेति। तत्र कारणमाह। यद्यस्मान्मातरं पितरं च। द्यौः पिता पृथिवी मातेति हि श्रुतम् । अतो द्यावापृथिव्यावित्यर्थः। ते उभे अपि साकं सहैव स्वायास्त्वन्वः स्वकीयाच्छरीरादजनयथाः। उद्पादयः। अतो नापुरिति सम्बन्धः॥३॥