ताः पूर्वोक्ता अस्येंद्रस्य पृशनायुवः स्पर्शनकामाः पृश्नयो नानावर्ण गाव इंद्रेण पातव्यं सोमं पयसा श्रीणंति । मिश्रीकुर्वंति । इंद्रस्य प्रियाः प्रीतहेतुभूतास्ता धेनवः सायकं शत्रूणामंतकारकं वज्रमायुधं हिन्वंति शत्रुषु प्रेरयंति । इंद्रो यथा शत्रुषु वज्रं प्रेरयति तथेंद्रस्य मदमुत्पादयंतीत्यर्थः । अन्यत्पूर्ववत् ॥ हिन्वंति । हिविः प्रीणनार्थः । इदित्वान्नुम् । सायकं षो अंतकर्मणि । ण्वुल्यात्वे युगागमः ॥ ११ ॥