हे इंद्र सुतमभिषुतमिमं सोमं पिब । कीदृशम् । ज्येष्ठ मतिशयेन प्रशस्यं मदं मदकरं अमर्त्यममारकम् । सोमपानजन्यो मदो मदांतरवन्मारको न भवतीत्यर्थः । तथा ऋतस्य यज्ञस्य संबंधिनि सदने गृहे वर्तमानाः शुक्रस्य दीप्तस्यास्य सोमस्य धारस्त्वामभ्यक्षरन् । आभिमुख्येन संचलंति । त्वां प्राप्नुवंति । स्वयमेवागच्छंतीत्यर्थः ॥ ज्येष्ठम् । प्रशस्यशब्दादिष्ठनि ज्य च (पा ५-३-६१) इति ज्यादेशः । अक्षरन् । क्षर संचलने । छांदसो लङ् ॥ ४ ॥