भोजाय दात्र आशुं शीघ्रगामिनमश्वं सं म्रुजन्ति। परिचारकाः सम्यगलङ्कुर्वन्ति। मृजू शौचालङ्कारयोः। तथा कन्या। कन्यात्वेनात्र सन्निकर्षादभिनवं यौवनं लक्ष्यते। अभिनवयौवना शुंभमाना शरीरावयवशोभया वस्त्राद्यलङ्कारशोभया च शोभमाना स्त्री तस्मै भोजाय दात्र आस्ते। तथा भोजस्य दातुरेव हृदयाह्लादकरम् वेश्म गृहं भवति। कीदृशम् । पुष्करिणीव। पुष्कराणि पद्मानि यस्याः सन्तीति पुष्करणी सरसी। सा यथा पद्महंसादिभिरलङ्कृता भवति तद्वत् परिष्कृतं वितानादिभिरलङ्कृतम्। परिपूर्वस्य करोतेर्भूषणार्थे संहितायां सुडागमः। परिनिविभ्य इति सुटः षत्वम्। गतिरनन्तर इति गतेः प्रकृतिस्वरत्वम्। तथा देवमानेव। सुपां सुलुगिति प्रथमैकवचनस्याकारः। देवमानमिव चित्रं मनोहरं वेश्म तस्य भवति॥१०॥