भोजा दातारोऽग्रे प्रथमेव योनिं क्षीरादेरुत्पत्तिस्थानं सुरभिं धेनुं जिग्युः। शत्रुभ्यो जितवन्तः। जि जये। लिटि सन् लिटोर्जेरित्यभ्यासादुत्तरस्य कवर्गादेशः। तथा भोजा दातारो वध्वं वधूं नवोढां स्त्रीं जिग्युः। किञ्च भोजाः शत्रूणां सुराया अन्तःपेयमन्तःपानं जिग्युः। पा पाने। भावे यत्। ईद्यतितीत्वम्। आर्धधातुकलक्षणो गुणः। कृदुत्तरपदप्रकृतिस्वरत्वम्। ये शत्रवोऽहूता बलाधिक्येनाहूयमानाः प्रयन्ति प्रमुखमागच्छन्ति तान्भोजा दक्षिणाया दातारो जनाजिग्युः । जयन्ति॥९॥