पुन᳚र्नो॒ असुं᳚ पृथि॒वी द᳚दातु॒ पुन॒र्द्यौर्दे॒वी पुन᳚र॒न्तरि᳚क्षम् ।
पुन᳚र्न॒ः सोम᳚स्त॒न्वं᳚ ददातु॒ पुनः᳚ पू॒षा प॒थ्यां॒३॒᳚ या स्व॒स्तिः ॥
पुन᳚र्न॒ः सोम᳚स्त॒न्वं᳚ ददातु॒ पुनः᳚ पू॒षा प॒थ्यां॒३॒᳚ या स्व॒स्तिः ॥
पदपाठः (Word-by-word)
पुनः᳚ । नः॒ । असु᳚म् । पृ॒थि॒वी । द॒दा॒तु॒ । पुनः᳚ । द्यौः । दे॒वी । पुनः᳚ । अ॒न्तरि᳚क्षम् ।
पुनः᳚ । नः॒ । सोमः᳚ । त॒न्व᳚म् । द॒दा॒तु॒ । पुन॒रिति᳚ । पू॒षा । प॒थ्या᳚म् । या । स्व॒स्तिः ॥
पुनः᳚ । नः॒ । सोमः᳚ । त॒न्व᳚म् । द॒दा॒तु॒ । पुन॒रिति᳚ । पू॒षा । प॒थ्या᳚म् । या । स्व॒स्तिः ॥
सायणभाष्यम् (Sayana Commentary)
पृथिवी देवी नोऽस्मभ्यमसुं प्राणं ददातु पुनः। दौर्देवतासुं ददातु । तथान्तरिक्षमन्तरिक्षदेवतासुं ददातु। तथा सोमो नस्तन्वं शरीरं पुनर्ददातु। तथा पूषा पोषाभिमानिनी देवता पथ्याम् । पन्था अन्तरिक्षम् । नि-११-४५। तत्र भवां वाचम् । वागात्मकः शब्दो ह्याकाशादुत्पद्यते। तां पुनर्ददातु। किञ्च या स्वस्तिर्यालोके वेदे च स्वस्तिरुच्यते तामपि पूषा प्रयच्छतु। यद्वा। पूषा पॊषं प्रयच्छतु। या स्वस्तिर्वाग्नाम्नी देव्यस्ति सा पथ्यां वाचं प्रयच्छतु। वाग्वै पथ्या स्वस्तिः। शत्त. ३-२-३-८। इति ब्राह्मणम्॥७॥