हे अग्नीषोमौ यो यजमान आहुतिमाज्याहुतिं वां युवाभ्यां दाशात् दद्यात् । अथवा हविष्कृतिं हविषा चरुपुरोडाशादिना कृतामाहुतिं यो यजमानो दद्यात् । स यजमानः प्रजया पुत्रपौत्रादिना युक्तं सुवीर्यं शोभनवीर्ययुक्तं विश्वं सर्वमायुर्जीवनं व्यश्नवत् । व्याप्नोतु ॥ आहुतिम् । जुहोतेः क्तिनि तादौ चेति गतेः प्रकृतिस्वरत्वम् । दाशात् । दाशृ दाने । लेट्याडागमः । यद्वृत्तयोगादनिघातः । हविष्कृतिम् । हविषः कृति करणं यस्यामाहुतौ । बहुव्रीहौ पूर्वपदप्रकृतिस्वरत्वम् । नित्यं समासेऽनुत्तरपदस्थस्येति विसर्जनीयस्यषत्वम् । अश्नवत् । अश्नोतेर्व्यत्ययेन परस्मैपदम् । लेट्यडागमः ॥ ३ ॥