यस्येन्द्रस्य हरी हरितवर्णावश्वौ सुयुजा सुष्ठु नियोज्यौ। सुशिक्षितावित्यर्थः। विव्रता। व्रतमिति कर्मनाम। विशिष्टकर्माणावर्वन्तावरणकुशलौ शेपा शेपवन्तौ। मत्वर्थो लुप्यते। प्रशस्तपुंस्त्वावित्यर्थः। उभोभौ रजी न रजसी द्यावापृथिव्याविव यद्वा महान्तौ रञ्जकौ सूर्याचन्द्रमसाविव केशिनौ प्रकाशमानौ केशवन्तौ वा ईदृशावश्वौ हे इन्द्र यस्य ते तव स्वभूतौ तयोः पतिः स्वामी त्वं दन् धनानि प्रयच्छन्ननु वेः। स्तुतशस्त्रादीन्यनुकामयस्व। दन्निति ददातेः शतरि च्छन्दस्युभयथेत्यार्थधातुकत्वादातो लोप इटि चेत्याकारलोपः। अत एव श्ल्वभावश्च॥२॥