हे इन्द्र मनसोऽक्पि जवीयानतिशयेन गन्ता ते त्वदीयो यो रथोऽस्ति तेन रथेन सोमपेयायास्मदीयं सोमं पातुमा याहि। आगच्छ। पा पाने। भावेऽचो यत्। ईद्यतितीत्वम्। आर्धधातुकलक्षणो गुणः। कृदुत्तरपदप्रकृतिस्वरत्वम्। तथा ते त्वदीया हरयो रथे संयुक्ता अश्वास्तूयं क्षिप्रमाभिमुख्येन प्र द्रवन्तु। प्रगच्छन्तु। व्रुषभिः सेक्तृभिर्येभिर्यैरश्वैर्मदन्दमानो मोदमानः सन् यासि गच्छसि। हरी इन्द्रस्येति वचनादिन्द्रस्य द्वावेवाश्वाविति न चोदनीयं आ त्वा सहस्रमा शतमित्यादिनिगमान्तरे दर्शनात्। ऋ. ८-१-२४॥२॥