हे रोदसी द्यावापृथिव्यौ वां युवाम् तदृतं सत्यम् प्रब्रवीमि यदरणीभ्यां जायमान उत्पन्नो गर्भो गर्भस्थानीयोऽग्निर्मातरारणी अत्ति भक्षयति। देवस्य द्योतनादिगुणस्याग्नेर्वर्तनं मर्त्यो मनुष्योऽहं न चिकेत। न जानामि। हे अङ्ग वैश्वानर अग्निररणीभ्यामुत्पन्नो विचेता विविधज्ञानवान् स प्रचेताः प्रकृष्टज्ञानः। अतो न जानामीत्यर्थः। अथवाङ्गेत्यात्मानमेव सम्बोध्यब्रवीमि। अग्निरेव विचेता बहुधा जानाति स प्रचेताः स एव जानाति। स्वमहिमानं नाहं स्तोतुं प्रभवामीत्यर्थः॥४॥