हे अग्ने अज्र्या। अजन्ति गच्छन्तीत्यज्रयो जनाः। तेभ्यो हितानि पर्वत्या पर्वतभवानि वसूनि गवादिलक्षणानि सं जिगेथ। शत्रुभ्यः सञ्जितवानसि। तथार्या बलवद्भिः कृतान्दासा दासैरसुरैः कृतान्वृत्राण्युपद्रवान्सं जिगेथ। तान्हतवानसीत्यर्थः। जि जये। लिटि रूपम् । शुर इव धृष्णुर्जनानां च्यवनस्त्वं पृतनायून्सङ्ग्रामकामानभि ष्याः। अभिभव। पृतनायूनित्यत्र लोपाभावश्चान्दसः। अश्वाघस्यादित्यात्वं विधीयमानमस्मादपि व्यत्ययेन भवति॥६॥