दीर्घतन्तुः। यैर्यज्ञं सन्तनोति ते तन्तवः स्तोत्रादयः। प्तभुतस्तुतिमान्बृहदुक्षा। उक्षा सेचको रश्मिः। प्रभुतरश्मियुक्तः सहस्रस्तरीर्हवीरूपबह्वाच्छादनः शतनीथ आवहनीयादिद्वारेण बहुविधनयन ऋभ्वा महान्द्युमत्सु दीप्तिमत्सु मध्ये द्युमानतिशयेन दीप्तिमानयमग्निर्नृभि कर्मनेतृभिरृत्विग्भिर्मृज्यमानोऽलंक्रियमाणो भवति। मृजू शौचालङ्कारयोः। स त्वं देवयत्सु देवान्कामयमानेषु सुमित्रेष्वस्मासु दीदयः। दीप्यस्व। दिदयतिर्दीप्तिकर्मा॥७॥