हे अश्विनौ सिंधु स्यंदनशीलां नदीं मधुमंतं मधुसदृशेनोदकेन पूर्णां याभिरूतिभिरसश्चतं अगमयतम् । प्रावाहयतमित्यर्थः । हे अजरौ जरारहितावश्विनौ वसिष्ठमृषिं याभिरूतिभिरजिन्वतम् । अप्रीणयतम् । याभिश्च कुत्सादींस्त्रीनृषीनावतम् । अरक्षतम् । ताभिः सर्वाभिरूतिभिरस्मानपि सुष्ठ्वागच्छतं ॥ मधुमंतम् । मधुशब्दाद्भूम्नि मतुप् । लिंगव्यत्ययः । असश्चतम् । सश्चतिर्गतिकर्मा । अस्मादंतर्भावित ण्यर्थाल्लुङ् ॥ ९ ॥