यद᳚ग्ने अ॒द्य मि᳚थु॒ना शपा᳚तो॒ यद्वा॒चस्तृ॒ष्टं ज॒नय᳚न्त रे॒भाः ।
म॒न्योर्मन᳚सः शर॒व्या॒३॒᳚ जाय᳚ते॒ या तया᳚ विध्य॒ हृद᳚ये यातु॒धाना᳚न् ॥
म॒न्योर्मन᳚सः शर॒व्या॒३॒᳚ जाय᳚ते॒ या तया᳚ विध्य॒ हृद᳚ये यातु॒धाना᳚न् ॥
पदपाठः (Word-by-word)
यत् । अ॒ग्ने॒ । अ॒द्य । मि॒थु॒ना । शपा᳚तः । यत् । वा॒चः । तृ॒ष्टम् । ज॒नय᳚न्त । रे॒भाः ।
म॒न्योः । मन᳚सः । श॒र॒व्या᳚ । जाय᳚ते । या । तया᳚ । वि॒ध्य॒ । हृद᳚ये । या॒तु॒॑धाना᳚न् ॥
म॒न्योः । मन᳚सः । श॒र॒व्या᳚ । जाय᳚ते । या । तया᳚ । वि॒ध्य॒ । हृद᳚ये । या॒तु॒॑धाना᳚न् ॥
सायणभाष्यम् (Sayana Commentary)
हे अग्ने यद्यदाद्यास्मिन्नहनि मिथुना स्त्रीपुंसौ शपातः परस्परमाक्रोशतः। यद्यदा रेभाः स्तोतारो चाचः सम्बन्धि तृष्टं कटुकं परस्पराक्रोशलक्षमधरं वा जनयन्त। परस्परमाक्रोशन्तीत्यर्थः। तदा मन्योर्दीप्तस्य क्रुद्धस्य वा तव। तथा च यास्कः। मन्युर्मन्यतेर्दीप्तिकर्मणः क्रोधकर्मणो वधकर्मणोवा। नि. १०-२९। इति। मनसः सकाशाद्या शरव्येषुर्जायते तया शरव्यया यातुधानान्राक्षसान्हृदये विध्य। ताडय। मारयेत्यर्थः॥१३॥