हे अग्ने त्वं नोऽस्मानधराद्दक्षिणतः। उत्तरादिदिक्समभिव्याहारादधरशब्दोऽत्र दक्षिणदिक्पर इति विज्ञायते। उदक्तादुत्तरतश्च रक्ष। पाहि। उतापि च हे अग्ने त्वं पश्चात्पश्चिमतः पुरस्तात्पूर्वतश्च नोऽस्मान्रक्ष। चतसृषु दिक्ष्ववस्थितेभ्यो राक्षसेभ्योऽस्मान्पाहीत्यर्थः। किञ्च ते तव सम्बन्धिनस्ते तपिष्था अतिशयेन तप्यमाना अजरासो जरावर्जिताः शोशुचतो ज्वलन्तः सन्तो रश्मयोऽघशंसं पापशंसकं राक्षसं प्रति दहन्तु। भस्मीकुर्वन्तु॥२०॥